பிப்ரவரி 27, 2012

மறந்து போகுமோ சுயநிர்ணய உரிமை!


நெருக்கடிக்குள்ளான உலகப்பொருளாதாரம், அரசியல் களநிலைமைகள் மனிதன் இன்னும் எங்கே போய் வாழ்வது, எப்படி வாழ்வது என்பது குறித்து எந்த வழிகாட்டலும் சொல்லவேண்டிய கடப்பாடு இல்லாமலே நகர்ந்து கொண்டிருகின்றன. ஏதோ அவரவர் இயல்புக்கும், கல்வித்தகுதிக்கும் ஏற்றாற்போல் வேலை கிடைக்கிறதோ இல்லையோ, காலத்தை கடத்திக்கொண்டு நகர்கிறது வாழ்வு. ஆண்டான் - அடிமை வாழ்வு, புரட்சி, இயந்திரமயமாக்கல், அறிவியல் தொழிநுட்ப வளர்ச்சி என்று தொடங்கி இன்று பொருளாதார நெருக்கடிகளுக்குள் சிக்கி மூச்சடைத்து நிற்கிறது மனிதவாழ்வு. இது ஒருபுறமென்றால் மனித உரிமை மீறல்கள், எதேச்சாதிகார ஆட்சி, அரசியல் ஊழல் என்று மனிதகுலம் எப்போதும் ஏதோவொரு நெருக்கடிக்குள் தள்ளப்பட்டுவது இன்னும் உச்சவேகத்தில் இயக்கப்படுகிறது ஏகாதிபத்தியக்கொள்கைகளால்.

செய்திகளை பார்க்க கேட்க நேர்ந்தால் உலகமெல்லாம் எங்கே எத்தனை அப்பாவி பொதுமக்கள் கொல்லப்பட்டார்கள், எங்கே உலகத்தலைவர்கள் கூடிப்பேசி கூட்டுச் செயற்பாட்டுக்கேற்ற திட்டங்கள் எதையும் முன்வைக்காமல் கூடிப்பேசுவதையே ஒரு தொழிலாய் கொண்டு பேசினார்கள் என்பதும் செய்திகள் ஆகின்றன. அப்படித்தான் ஒரு மனப்பதிவை உருவாக்குகிறது ஐ. நா. வின் மனித உரிமைகள் சபையின் 19 வது கூட்டத்தொடரும். மனித உரிமைகள் சபை கூட்டத்தொடர் என்றாலே இப்போதெல்லாம் ஈழத்தமிழர்களுக்கும் ஒரு தவிர்க்கமுடியாத எதிர்பார்ப்பும் வந்து மனதோடு ஒட்டிக்கொள்கிறது. ஏதாவது ஒரு நன்மை நிகழாதா எமக்கும் என்று மனம் அங்கலாய்க்கும்.

ஈழத்தமிழர்கள் இனப்படுகொலைதான் செய்யப்பட்டார்கள் என்று எங்களுக்குரிய நியாயமான தீர்ப்பு சர்வதேச சட்டங்கள், அரசியல் தத்துவங்களின் அடிப்படையில் வழங்கப்படாதா என்கிற ஒரு நப்பாசையாய் வளராமலும் இல்லை. அதிலும் எத்தனை ஈழத்தமிழர்கள் இறுதிப்போரில் கொல்லப்பட்டார்கள் என்கிற எண்ணிக்கையே மாற்றி, மாற்றி குழப்பப்படுகிறது. இறுதிப்போர் தொடங்கிய நாள் முதல் மன்னாரின் பேராயர் இலங்கை அரசின் அவ்வப்போதைய புள்ளிவிவரங்களின் அடிப்படையில் சொல்லிவந்த கணக்கின் படி வடக்கில் இறுதிப்போர் உச்சமடைந்த காலகட்டதில் 1,46,679 தமிழர்கள் கணக்கில் வரவில்லை என்பதனை படிப்பினைகள் மற்றும் மீளிணக்க ஆணைக்குழுவின் விசாரணையின் போது எழுத்தில் கொடுத்தார். பின்னர், டருஸ்மன், ஐ. நா. வின் மூவர் குழு அறிக்கையின் படி 40,000 பொதுமக்கள் கொல்லப்பட்டிருக்கலாம் என்று சொல்லப்பட்டது. இப்போது, இலங்கை அரசின் ஒரு புள்ளிவிவரப்படி அது 9,000 பேர், அதுவும் மற்றவர்கள் என்கிற பட்டியலில் இறந்தவர்களாய் சேர்க்கப்பட்டிருக்கிறார்கள். மற்றவர்கள் என்பதன் வரைவிலக்கணம் இலங்கை அரசுக்கே வெளிச்சம்.


படுகொலை செய்யப்பட்டவர்கள் எண்ணிக்கை மட்டுமல்ல இங்கே கணக்கில் கொள்ளப்படவேண்டியது. அதன் நோக்கமும் தான். இலங்கை அரசின் நோக்கமே ஒரு திட்டமிடப்பட்ட இனப்படுகொலை என்பது யாருக்கும் எந்த சர்வதேச அரசியல் சாணக்கியர்களுக்கும் புரியாமல் இல்லை. ஆனால், அது அவர்களின் நிகழ்ச்சி நிரலுக்கு ஏற்றாற்போல் திரிக்கப்பட்டு திசைதிருப்பப்படுகிறது. இதற்கெல்லாம் கதை, வசனம் எழுதி இயக்குபவர்கள் இலங்கை-இந்திய அரசுகள் என்றால் அதற்கு நோகாமல், கண்டும் காணாமல் தலையசைப்பது அமெரிக்கா. சமயசார்பற்றதாய் இருந்த தேசியங்களை, சவுதி அரேபியா, ஆப்கானிஸ்தான், அடிப்படைவாத தேசியமாய் மாற்றிக் கட்டமைத்த சித்துவேலையை தான் அமெரிக்கா இப்போது இலங்கையிலும் செய்துகொண்டிருக்கிறது. இலங்கையை ஒரு பெளத்தமத அடிப்படைவாத கட்டமைப்போடு தக்கவைக்க முயற்சி செய்கிறது தன் நிகழ்ச்சி நிரல் கருதி.

இலங்கையின் போர்க்குற்றங்கள் விசாரிக்கப்பட வேண்டுமென்று மனித உரிமைகள் சபையின் 19வது கூட்டத்தொடரில் தீர்மானம் கொண்டுவரப்பட்டால் அதை ஆதரிப்போம் என்று அமெரிக்காவின் தெற்காசிய பிராந்திய பிரதி ராஜாங்க செயலர் ரோபர்ட் ஒ பிளேக் இலங்கைக்கே சென்று சொன்னார். குழந்தையையும் கிள்ளிவிட்டு, தொட்டிலையும் ஆட்டுவிக்கும் கலை அமெரிக்கரான இவருக்கு சிறப்பாய் வரும். இவரது கூற்றில் இலங்கைக்கு சொல்லப்பட்ட பாடம், நிறையவே குறைபாடுகளுடன் உருவாக்கப்பட்ட கற்றுக்கொண்ட பாடங்கள் மற்றும் நல்லிணக்க ஆணைக்குழுவின் அறிக்கையையாவது நிறைவேற்றித் தொலையுங்கள் என்பது தான். இல்லையென்றால் அமெரிக்க குடியுரிமை கொண்ட இலங்கையின் பாதுகாப்பு செயலர் கோத்தபாய ராஜபக்‌ஷேவை தமிழர்கள் அமெரிக்க சட்டத்தின் கீழ் விசாரிக்கப்பட வேண்டுமென்று சொல்லிவிடுவார்களோ என்கிற கவலை அவர்களுக்கு.

ஐ. நா. வின் மனித உரிமைகள் சபையின் தற்போதைய கூட்டத்தொடரில் இலங்கை குறித்த தீர்மானம் அமெரிக்காவுக்கும், அமெரிக்க ஏகாதிபத்திய காழ்ப்புணர்வை மனதில் கொண்டு பழி தீர்க்க காத்திருக்கும் இஸ்லாமிய, லத்தீன் அமெரிக்க நாடுகள், மற்றும் சீனா, ரஷ்யா, கியூபா நாடுகளுக்கும் இடையே உள்ள இழுபறியை மீறி கொண்டுவரப்பட்டாலும், உருப்படியாய் எதுவும் நடக்கப்போவதில்லை என்பதே யதார்த்த உண்மை. மனித உரிமைகள் சபையில் அவ்வாறானதொரு தீர்மானத்தை உருவாக்கி இலங்கையில் சட்ட ஒழுங்கு, அரச நிர்வாகம், அரசின் பொறுப்பாட்சி என்கிற கேலிக்கூத்து வடிவங்களின் வழி நல்லிணக்க மற்றும் மீளிணக்க ஆணைக்குழுவின் இத்துப்போன பரிந்துரைகளை நிறைவேற்ற வேண்டுமென்கிற தீர்மானத்தை தவிர வேறேதும் உருப்படியாய் செய்ய முடியுமா இவர்களால்!

அமெரிக்காவின் கட்டுப்பாட்டில் இருக்கும் மனித உரிமைகள் காப்பகம், தமிழ் தேசியத்தை மறவுங்கள் என்று தமிழனுக்கு பாடம் எடுக்கும் சர்வதேச நெருக்கடிகள் குழு (International Crisis Group), மற்றும் சர்வதேச மன்னிப்புச்சபை என்பனவும் ஏகாதிபத்திய சர்வதேச அரசியல் கொள்கைவகுப்பாளர்களை மீறி எதையும் சாதிக்கப்போவதுமில்லை. மீண்டும் மீண்டும் போர்க்குற்றங்கள், மனிதத்திற்கு எதிரான குற்றங்கள் என்கிற அதே உடைந்த ரெக்கோர்ட் பல்லவி தான் இவர்களும் பாடுவார்கள். போர்க்குற்றங்கள் விசாரிக்கப்பட வேண்டும். அதற்கு தன்னிச்சையான சர்வதேச விசாரணைக்குழு ஒன்று அமைக்கப்பட வேண்டும் என்று சொல்லிக்கொண்டே இருப்பார்கள். யாருமே இலங்கையின் இனவிரோத, இனவழிப்பு அரசியல் கொள்கைகளின் அடிப்படையில் ஈழத்தமிழர்களின் சுயநிர்ணய உரிமை பற்றி பேசப்போவதில்லை.

என்ன இருந்தாலும் இன்னும் நம்பிக்கை இழக்காமல் ஐ. நா. சபை முன்றலில் தமிழர்கள் ஆர்ப்பாட்ட ஒன்று கூடல் நடத்தினால், இலங்கை அரசுக்கு ஆதரவாகவும் ஆர்பாட்ட ஒன்றுகூடல் நடைபெறுகிறது. அதேபோலவே, இலங்கையிலும் மேற்குலங்களுக்கு எதிரான ஆர்ப்பாட்ட ஊர்வலங்கள் நடத்தப்படுகின்றன. இதன் உச்சக்கட்ட எரிச்சல் மனித உரிமைகள் சபையில் இலங்கையின் பிரதிநிதிகளின் தலைவர் மஹிந்த சமரசிங்க இறுதிப்போரில் கொல்லப்பட்டவர்களின் எண்ணிக்கை மிகைப்படுத்தப்பட்டதாகவும், நல்லிணக்க ஆணைக்குழுவின் பரிந்துரைகளை நடைமுறைப்படுத்துமாறு கோரும் தீர்மானமே தேவையில்லையாம் என்று பேச்சு.

இலங்கை சிங்கள பெளத்த ஆட்சியாளர்களையும், ஏகாதிபத்திய கொள்கை வகுப்பாளர்களையும் அதற்கு துணை போகிறவர்களையும் தாண்டி, இனப்படுகொலை செய்யப்பட்ட ஈழத்தமிழர்களுக்கு நியாயமாய் கிடைக்கவேண்டிய நியாயத்துக்கும, சுயநிர்ணய உரிமைக்குமாய் நாம் செல்ல வேண்டிய தூரம் இன்னும் நிறைய இருக்கிறது. ஆனாலும், இதையும் ஓர் படிக்கல்லாக மாற்ற முடிந்தால் அதுவும் வலுதான். எவ்வளவையோ பொறுத்தாயிற்று இந்த ஐ. நா. மனித உரிமைகள் 19 வது கூட்டத்தொடரையும் பொறுத்திருந்து பார்த்து முன்னேறும் ஈழத்தமிழ் சமூகம், சுயநிர்ணய உரிமை நோக்கி!

Image Courtesy: Google

பிப்ரவரி 22, 2012

மனசுக்குள் கிறுக்கியவை!


திருந்தாத நான்

நம்பிக்கையானது
வார்த்தைகளில்
உருவாகி
வாக்குறுதிகளில்
கெட்டிப்பட்டு
அவரவர் தேவைக்காய்
உடைக்கப்பட
சிதறிப்போகும் மனம்
மீண்டும் அதை
ஒட்டவைக்க
எனது தேவை
இன்னோர்
போலி உத்தரவதாம்





என் மனம்!
அழகானது
சுவாரஸ்யமானது
சுகமானது
சுமையானது
தன்னைத்தானே
சீண்டிப்பார்க்கும் தருணங்கள்
எரிச்சலானது
இருந்தும் நேசிக்கிறேன்
என்னை நான்!








காதல்!
வெற்றி
தோல்வி
கொண்டாடத்தெரியாத
அழகான உணர்வு
உணார்வுகளுக்கேது
வளர்சிதை மாற்றம்.



பிப்ரவரி 19, 2012

ஈரான் - அமெரிக்கா - இஸ்ரேல் - அணு ஆயுதம்!

அமெரிக்கா கண்டுபிடித்த பயங்கரவாதம் இப்போ கொஞ்சம் காலாவதியாகிவிட்டது. இனி எதை தூசி தட்டி மிச்சமிருக்கிற தங்களுடைய பொருளாதார கொள்கைக்களுக்கு தடையாக இருப்பவர்கள் மீது பாயலாம் என்று கங்கணம் கட்டிக்கொண்டு அலைந்ததில் மாட்டியது ஈரானின் அணு ஆயுதம். எங்கள் சொந்த மண்ணை, எங்கள் மூதாதையரும் நாங்களும் ஆண்ட மண்ணை திருப்பி கேட்டால் மறுக்கப்படும் எந்தவொரு காரணகாரியங்களும் சுட்டிக்காட்டப்படாமலே. காரணம் சொல்லவேண்டிய தேவையுமில்லை யாருக்கும், ஈழத்தமிழர்கள் எப்போதும் இழி நிலையில் இருந்தால். சொந்தமாய் நிலமில்லாதவர்களுக்கு யாரிடமிருந்தாவது மண்ணை பிடுங்கி நாடமைத்துக் கொடுத்தால், அவர்கள் அடிக்கும் கொட்டம் உலகம் கண்டும் காணாது. இஸ்ரேலைத்தான் சொல்கிறேன். எப்போதும் செல்லப்பிள்ளையாய் பெரியண்ணனால் வளர்க்கப்பட்ட நாடு.

இஸ்ரேல் அணு ஆயுதம் வைத்திருக்கிறது என்பது பரகசியம். இஸ்ரேலுக்கு ஏன் அணு ஆயுதம் என்றால் சுற்றியுள்ள அரபு நாடுகளால் இஸ்ரேலுக்கும் இஸ்ரேலின் மக்களுக்கும் ஆபத்து என்று காரணம் சொல்வார்கள். அப்போ, இஸ்ரேலின் அணு ஆயுதம் சுற்றியுள்ள அரபு நாட்டிலுள்ள மக்களின் உயிருக்கு ஆபத்து இல்லையா என்றும் தோன்றலாம். இஸ்ரேலின் அணு ஆயுத பலத்துக்கு சமமான அதே பலத்தை ஈரான் உருவாக்கினால் அது குற்றம் என்பது மேற்குலகின் கூழ்முட்டை விவாதம். இஸ்ரேலில் உள்ளூரிலுள்ள பாலஸ்தீனியர்களுக்கே இஸ்ரேலிடமிருந்து பாதுகாப்பற்று போகும் போது, சுற்றியுள்ள அரபு நாடுகளில் உள்ளவர்களுக்கு இஸ்ரேலின் அணு ஆயுதத்திடமிருந்து பாதுகாப்பு எப்படி கிடைக்கும் என்று என் பொதுப்புத்திக்கு கேள்வி வரும். ஆனால், பதில் சொல்ல தெரியாது. அமெரிக்கா, இஸ்ரேல் என்கிற இரண்டு அணு ஆயுத பலம் கொண்ட நாடுகளின் படைகள் ஈரானை சுற்றி இருக்க, ஈரானை அணு ஆயுதம் செய்யாதே என்று சொன்னவுடன் ஈரான் ஆமாம் சாமி போடுமா!

இஸ்ரேலிய ராணுவ வரலாற்று ஆசிரியரான Martin Van Creveld, International Herald Tribune இல் எப்போதோ எழுதிய கட்டுரை ஒன்றில் ஈரான் அணு ஆயுதம் உருவாக்குவதை தாங்கள் விரும்பவில்லை எனவும்; ஆனால், அவ்வாறு அவர்கள் உருவாக்காமல் இருந்தால் அவர்கள் பைத்தியக்காரர்கள் என்றும் நோம் சாம்ஸ்கி தன் எழுத்தில் குறிப்பிடுகிறார். அவர் அவ்வாறு கூறக்காரணம் மேலே சொன்ன காரணமே தான். நேரடியாகவோ, மறைமுகமாகவோ தங்களுக்கு சாதகமாக எதையாவது ஒன்றை உருவாக்கி (ஜனநாயக கொள்கைகள், பயங்கரவாதம், அணு ஆயுத பூதம்), அதன் வழி தங்கள் நிகழ்ச்சி நிரல்களை நிறைவேற்றுவது அமெரிக்காவின் வழக்கம்.

சரி, விஷயம் இதுதான். ஈரான் அணு ஆயுத உற்பத்திக்கு தேவையான யுரேனியத்தை அதன் அத்தியாவசியத் தேவையான சக்தி உற்பத்திக்கு தேவைப்படுத்துவதை விட  அதிகமாக செறிவு படுத்துகிறது என்பது தான் அதன் மீதான மேற்குலகத்தின் குற்றச்சாட்டு. 2010 ம் ஆண்டு மாசி மாதம் வரை ஈரான் யுரேனியத்தை 5% மட்டுமே செறிவாக்கியது. அதற்குப்பிறகு அது 20% ஆக அதிகரித்தது மேற்குலகுடனான ஒப்பந்தத்தின் அடிப்படையில்.

யுரேனியம் அகழ்ந்தெடுக்கப்பட்டு, பின்னர் அது வாயு வடிவில் மாற்றப்பட்டு செறிவுபடுத்தப்படுகிறது. மேலும் அது சுத்திகரிக்கப்பட்டு குறைந்தளவாக 3.5% செறிவு படுத்தப்பட்டு சக்தி தேவைகளுக்கு பயன்படுத்தலாம் எனவும்; அதிக உட்சபட்ச சுத்திகரிப்பு (90%) போராயுதமாக உருவாகும் அபாயம் உண்டு என்பதும் மேற்குலகின் ஈரான் குறித்த குற்றச்சாட்டு.

ஈரான் மீதான அமெரிக்காவின் காண்டு இன்று நேற்று ஆரம்பமானது அல்ல. 1953-1979 வரை அமெரிக்காவுக்கு ஆதரவான ஆட்சி இஸ்லாமியப்புரட்சி மூலம் கவிழ்க்கப்பட்டு மதவழி ஆட்சி செய்ய ஏதுவான நாள் முதல் தொடங்கியது. ஈரானில் மனித உரிமை மீறல்கள் உண்டு என்று ஒத்துக்கொள்ளும் எத்தனையோ ஈரானியர்கள், மேற்குலகம் அளவுக்கு அதிகமாக ஈரானை அது குறித்து விமர்சிக்கிறது என்றும் குறிப்பிடுகிறார்கள். அமெரிக்காவின் ஊடக, பத்திரிகை தர்மம் 1953-1979 ம் ஆண்டுவரை ஈரானில் நடந்த சித்திரவதைகளையோ அல்லது சட்டத்துக்கு புறம்பான கைதுகளையோ வழமை போல் கண்டு கொண்டது கிடையாது. அமெரிக்காவுக்கு ஆதரவான ஆட்சி கவிழ்ந்தவுடன் திடீரென்று ஈரானில் இழைக்கப்படும் மனித உரிமைகள் மீறல்கள் பற்றி 1979 முதல் எழுத ஆரம்பித்தன.

ஈரான் ஜனாதிபதி மொஹமட் அஹம்திநிஜாட் அண்மையில் ஈரானின் 33 வது இஸ்லாமிய புரட்சி ஆண்டின் நினைவாக பேசும் போது ஈரான் யுரேனியத்தை செறிவு படுத்துவதை ஒரு போதும் நிறுத்தப்போவதில்லை என்று பேசியுள்ளார். அணு ஆயுதம் தயாரிப்போம் என்று அவர் நேரடியாய் ஒரு போதும் பேசவில்லை என்றும் மேற்குல ஊடகங்கள் குறிப்பிட்டன. ஈரானிய ஜனாதிபதி அப்பப்போ முரண் நகையான வாக்குமூலங்களையும் அள்ளிவீசுபவர். யூதர்களின் ஹோலோஹோஸ்ட் பற்றி எசகுபிசகாய் கருத்து சொன்னது முதல் அமெரிக்க ஆளில்லாத Drone (RQ 170 Sentinel) ஒன்றை கடந்த வருடம் ஈரான் கைப்பற்றியதை காட்சிப்படுத்தியது வரை அமெரிக்கா என்ற சிங்கத்தை சீண்டிப்பார்க்கிறார். ஆனால், அமெரிக்காவும் பிரித்தானியாவும் ஈரானின் மத்தியவங்கியின் பொருளாதார நடவடிக்கைகளை மற்றைய நாடுகளில் முடக்கி விட்டன. இப்போது ஈரான் பேச்சுவார்த்தைக்கு அழைக்கிறது. இது எங்கே போய் முடியும்!

இப்படி எப்போதும் தங்களுக்கு சாதகமான நிகழ்ச்சி நிரல்களுக்கு கொள்கைகளை வகுப்பதை நிறுத்தி, அணு ஆயுதம் தயாரிப்பதை எப்படி தடுக்கலாம் என்று ஆக்கபூர்வமாக சிந்திக்கலாம், செயற்படலாம் என்று மத்தியகிழக்கு தொடர்பான அமெரிக்க கொள்கைகளை தன் விரல் நுனியில் வைத்திருக்கும் நோம் சாம்ஸ்கி சொல்வதை சொல்லலாம். International Atomic Energy Agency - Director Genaral சில வருடங்களுக்கு முன் அணு ஆயுதம் உற்பத்தி அளவுக்கு போகாதவாறு சர்வதேச கட்டுப்பாடுக்ள் தேவை என்று முஹமட் அல்பராடி (எகிப்தியர்-எகிப்திய எழுச்சியின் போது அதிகம் பேசப்பட்டவர்) ஒரு வரைவை கொண்டு வந்த போது அமெரிக்கா அதை கேட்கத் தயாராயில்லை.

அணு ஆயுத உற்பத்திக்கு பாவிக்கப்படும் 'Fissile Material' மீது சர்வதேச கட்டுப்பாடு மற்றும் கண்காணிப்பு கொண்டுவரப்பட வேண்டுமென்று ஐ. நா. வில் தீர்மானம் கொண்டுவந்த போது அமெரிக்கா எதிர்த்து வாக்களித்ததாம் 147:1 என்கிற வீதத்தில். இஸ்ரேல் வாக்களிக்காமல் விலகி இருந்தது. இப்படி திருடர்களே திருந்தாமல் எப்படி திருட்டை ஒழிப்பது!

இவையெல்லாம் தவிர அணுக்கரு பரவாமை ஒப்பந்தம் (Nuclear Non-Proliferation Treaty - NNPT) பிரகாரம் ஈரான் எந்த விதிகளையும் மீறியதுக்குண்டான ஆதாரம் இல்லை என்றும் சொல்கிறார்கள். ஈரானிடம் அணு ஆயுதம் உருவாக்கும் முயற்சிகள் இருக்கிறது என்றும் சொல்கிறார்கள். எது எப்படியோ, ஒரு அணு ஆயுத யுத்தம் இந்த உலகிற்கு தேவையா!

போர் பூமியில் ராணுவச்சமவலு என்பதும் இது போல் மிரட்டும் அணு ஆயுதப்போர் சூழலில் அது குறித்த சமவலுவும் இருந்தாலே போர் நிகழும் சூழல் சமநிலைப்படுத்தப்படும். இந்தியா அணு ஆயுதம் பரிசோதிக்க, பாகிஸ்தானும் அதையே செய்ய அது அந்த பிராந்தியத்தில் அணு ஆயுதம் குறித்த ஒரு சமநிலைக்கு வித்திட்டது.

Image Courtesy: Google